Bum tâwk Mizo nulate Aizawlah thlen tawh; Thil sual tia puhte Uttarakhand-ah an táng

Mizoram Police leh Rudrapur Police ṭang dunin May 5, 2026-a Beauty Queen Salon & Spa, Rudrapur, Uttarakhand aṭanga an chhan chhuah Mizo hmeichhe pangate chu May 9, Inrinni khan Aizawl thlenpui an ni.

Mizo hmeichhia pangate hi police-te'n an chhan chhuah hnuah Child Welfare Committee (CWC), Rudrapur-in an kawl a, CWC-a tih tur ṭulte tihfel a nih hnuah court-ah Mizorama hruai haw phalna dil a ni. Thil ṭulte tihfel a nih hnuah May 9 khan Aizawl rawn thlenpui an ni a, Social Welfare department enkawlna hnuaiah an awm.

Mizo hmeichhiate bum chhuah an nihnaah hian a mawhphurtu bera ngaih chu Lalnunsiami (30), Kolasib New Diakkawn leh pasal anga a neih Spa neitupa Mohmmad (31) s/o Mohammad Ali, Bareilly, Uttar Pradesh, tuna Rudrapur-a awm mek an ni. Anni bakah hian mi pali dang man an ni a, Rudrapur Police Station-ah thubuai ziah luh niin, an tâng mek. Mawhphurtute hi Mizorama lak dan tur Mizoram Police chuan court kaltlangin an ngaihtuah dawn a ni.

Tarlan tawh angin, All Women Police Station, Aizawl chuan May 1, 2026 khan Mizo hmeichhe pakhat hnen aṭangin FIR an dawng. FIR-a a ziah danin, amah leh a ṭhiannu chu Beauty Queen Salon & Spa, Rudrapur, Uttarakhand-ah thla khata Rs 20,000 hlawha thawhna tur a awm tih hriain, October, 2025 khan an kal a; an kal man pawh an thawhna tur spa neituin a tihfelsak a ni.

An hnathawh tumna hmun an thlen chuan, hlawh an hmuh theihna tur chuan mipat hmeichhiatna (extra services) an tih tel ngei a ngai tih hrilh an ni. Ni khatah dawrtu mi pathum atanga pakua neih luihtir an ni a, dawrtu tur an neih dawnin an hrai rui ṭhin.

An hmeichhiatna zawrh luihtir an nih hnuah pawh an hlawh tura an tiam pek an ni ngai loa, ei leh in leh an kalna senso rulhna atan cut sak vek zel niin, thla khatah Rs 500 chauhte hman tur an pe ṭhin. An tlanbo loh nan an awmna in chu tala-in an kalh hnan ṭhin.

April 4, 2026 zing khan tala chu tuboh leh chhèní hmanga chhu chhiain an tlan chhuak a, April 7, 2026-ah Aizawl thlengin FIR an thehlut. Mizo hmeichhe dang táng mek an awm tih hriat a nih avangin, chhan chhuak tur leh thil sual titute chunga dan anga action lak a nih theih nan Mizoram Police team leh Women and Child Development department mite chuan May 4, 2026 khan Rudrapur an pan.

Mizoram Police leh Rudrapur Police chuan May 5, 2026 khan Beauty Salon & Spa chu an luhchhuah a, Mizo hmeichhia panga an chhan chhuak a, an zingah kum tling lo pahnih an tel a ni.