KHAWTHLIR

Thisen pe

May 9, Inrinni khan KṬP, Khatla South Branch chuan an kohhran hall-ah Synod Hospital, Aizawl tan thisen unit 51 an pe a, petute mipa 47 leh hmeichhia pali an ni. ṬKP, Chawngte-L Bial pawhin Inrinni khan an khuaah thisen pek huaihawtin, Lunglei Civil Hospital tan thisen unit 36 an pe a, petute mipa 31 leh hmeichhia panga an ni.

LAD Day hmang

Nimin May 10 kha United Pentecostal Church (North East India) nuho pawl, Ladies Auxiliary Department (LAD) din ni, LAD Day vawi 57-na a ni a; he ni pual hian pastor bial leh tualchhung kohhran hrang hranga LAD-te'n hun an hmang. LAD hi kum 1969 khan Shillong Peak Hotel-a UPC-NEI Executive Board hmasa berin an din a, president hmasa ber chu Audrine Scism a ni.

ZMCH-ah Neonatal Resuscitation Day

Zoram Medical College & Hospital-a Department of Pediatrics leh Department of Obstetrics & Gynaecology chuan May 9, Inrinni khan ZMCH Examination Hall-ah 'Neonatal Resuscitation Program Day' an hmang. Day hi ZMCH dean Prof. Swati M Patki-in a hmanpui a, ZMCH-a pediatrician, gynaecologist, medical officer, doctor zirlaite leh nurse-te an tel. Day-in a tum ber chu, doctor leh nurse te hnena nausen piang hlim, harsatna neite chhan chhuah dan zirtir a ni.

Mother's Day hmang

Nimin kha Mother's Day a ni a, Salvation Army corps hrang hrangte chuan tualchhung biak-in hrang hranga inkhawmah nute pualin hun an hmang a, nute hnenah chawimawina an hlân. Mother’s Day hi USA-ah chuan kum 1814-ah hman ṭan a ni a; Sipai Tlangau July-August 1936 chhuaka tarlan danin, Mizoramah chuan kum 1936 aṭangin hman a ni.

Vawksa kg 1 Rs 450

Mamit district bawrhsap Suvigya S Chandra chuan hriattirna a tichhuak a, The Mizoram Market (Regulation and Facilitation) Act, 2022-in thuneihna a pek angin Mamit district-ah vawksa kg khat Rs 450 aia sang loa hralh tur a nih thu puangin, vawksa man bituk zawm lo chu dan anga hrem theih an nih thu a tarlang.