Lungleiah Science Exhibition buatsaih

May 7-8, 2026 chhung khan Lunglei High School-ah 44th Rajya Stariya Bal Vaigyanik Pradarshani (State Level Science Exhibition) buatsaih a ni a, Lunglei West bialtu MLA T Lalhlimpuia'n a hmanpui. Exhibition-a telte write-up chu NCERT-ah thawn a ni dawn.

Science Exhibition hi Mizorama science leh mathematics zirna tihhmasawn nan leh chawi lârna atana State Council of Educational Research & Training (SCERT)-a Science Promotion Wing (SPW), Lunglei District Samagra Shiksha leh NCERT te buatsaih a ni a; thupui chu 'STEM for Viksit and Atmanirbhar Bharat' tih a ni.

Intihsiaknaa tel zirlaite chu thupui pasarih - sustainable agriculture, waste management & alternative to plastics, green energy, emerging technologies, recreational mathematical modeling, health & hygiene leh water conservation & management hmangtein an inel.

Exhibition-a telte write-up chu National Science Exhibition atan NCERT, New Delhi-ah thawn a ni ang a, chumi aṭang chuan National Science Exhibition-a tel tur an thlang dawn. Best Guide Teacher atan Isaac Lalengkima, Bethel Mission School, Champhai thlan a ni.

T Lalhlimpuia chuan, science leh mathematics-in ramri kham a neih loh thu sawiin, "Science chu thu dik leh thil tak taka tawp ṭhin, subject danglam leh ropui tak a ni, India-in kum 2047-a Atmanirbhar Bharat (Developed India) nih a tumnaah tuna zirlaite'n tih theih an ngah dawn," a ti.

Science & technology hmanga tualchhuak thil thar chìn chhuah leh ngaihtuah chhuah tum zel tur te, chhim lam kawngpui lian sial mek KMMTTP-in remchanna leh hna tam tak a siam tur chhawr ṭangkai thei tura ṭawng leh thiamna ngaite lo nei lâwk turin T Lalhlimpuia chuan zirlaite a fuih a ni.