Sairang - Kawnpui kawng siam mekah hmasawnna tam tak kan hmu - ZPM Ṭhalai

ZPM Ṭhalai hruaitute chuan May 9, Inrinni khan a ṭum riatna atan NH-06 Kawnpui - Sairang inkar kawngpui siam mek an enfiah a, kawng siamah hmasawnna tam tak an hmuh thu an tarlang.

ZPM Ṭhalai president Jeje Lalpekhlua, MLA chuan, Kawnpui-Sairang kawng chu nikum fûrah sorkar leh pawl hrang hrangte'n an buaipui nasat thu a sawi a, "ZPM Ṭhalai chuan inspection leh monitoring te kan mawhphurhnaah dahin, group-a inṭhenin kar tin detailment siamin kan tlawh ṭhin. Nikum ngaihtuah chuan tun dinhmunah chuan hmasawnna tam tak kan hmu," a ti.

Jeje Lalpekhlua chuan, hmasawnna a awm theihna tura sorkar hotu te, a bikin Chief Minister-in theihtawp an chhuah tih sawiin, "NHIDCL leh company-te nen sawihonate neiin, vawiina hmasawnna kan hmuh hi ZPM sorkarin chak taka a nawr vang niin kan ngai," a ti a; hmabak la awmte pawh rei lo te chhunga thawh zawh beisei a nih thu a sawi.

ZPM Ṭhalai tarlan danin, February 21, 2026-a kawng siam an tlawh ṭuma NHIDCL, J Infratech Ltd leh BR Goyal Ltd hotute'n kumin April leh May thla chhunga an chanpual siam zo vek tura an intiamnate chu an bawhzui zel a ni.

Buichali leh Sairang inkar enkawltu J Infratech chuan ni 15-20 thawh tur hna an la neih thu an sawi. Buichali lei leh Sairang inkar chu May 12, 2026 aṭangin resurfacing leh pads repair an chhunzawm dawn a, harsatna a awm loh chuan ni 15-20 chhungin an zawh theih tur thu an sawi a ni.

Mualkhang leh Buichali lei inkar enkawltu BR Goyal Ltd chuan an hna chanpual chu an zawh tawh thu leh NHIDCL lamin inspection an neih tawh thu ZPM Ṭhalai hruaitute an hrilh.