Tourism department-a thawktute Director rawih nawn vangin lawm

Mizoram Tourism Service Association (MTSA) leh Tourism Staff Welfare Association (TSWA) chuan thuchhuah siamin, an director R Lalrodingi rawih nawn (re-employed) a ni chu lawmawm an tih thu an tarlang. R Lalrodingi rawih nawnna order hi sût turin MZP chuan sorkar an lo ngen tawh a ni.

MTSA leh TSWA chuan, an director R Lalrodingi chu North Eastern Council (NEC)-ah hun rei tak tourism adviser hna lo thawk tawh a ni tih an tarlang a, "Tourism department chuan kawng hrang hrangin nasa takin hma a sawn phah a, a hlâwkpui tak zet a ni. Central leh state sorkarah te pawh hetianga mi bikte hi chu rawih nawn an ni fo ṭhin," an ti.

R Lalrodingi rawih nawn a nih theih nan sorkarah an ngen thu tarlangin MTSA leh TSWA chuan, "Kan ngennate sorkarin ngai pawimawhin min tihhlawhtlinsak a ni," an ti a; Tourism department-a officer zingah directror ni thei an awm hma atana director ni lai R Lalrodingi, May 1, 2026 aṭanga re-employ tura tih a lo ni chu lawmawm an ti a, an thlâwp thu an tarlang a ni.

Tarlan tawh angin, April 30, 2026 kha Tourism director R Lalrodingi sorkar hna aṭangin superanuation pension-a a chhuah hun a ni a, Mizoram sorkar chuan a thawh hun pawtseiin, Tourism director atan a dah zui a, OSD to CM atan a ruat nawn bawk. Tourism director a nihna hi Tourism department-a Joint Director ni mekin seniority-ah director a nih theih hun thleng emaw, order dang awm leh hma loh zawng emaw atan a ni.

Hetih lai hian, Tourism director atana R Lalrodingi rawih nawn a ni chu MZP chuan duh loin an dodal a; Mizoram mipui leh hna zawng mekte zah lohna leh hmusitnaah an ngaih thu sawiin, rawih nawnna order chu May 14, 2026 ral hmaa sût turin Mizoram sorkar an ngen a ni.