Police-in Year of Discipline hmang ṭan

Mizoram Police chuan nimin khan Year of Discipline 2026-27 an hmang ṭan a; hman ṭanna pualin nimin khan Mizorama Police unit hrang hrangte'n an hmun ṭheuhah programme an buatsaih.

Year of Discipline hi Home minister K Sapdanga chuan May 6, 2026 khan Police Headquarters-ah a hawng a; Mizoram Police Fitness Improvement Programme hnuaia kalpui mek 'Train to Excel' tihchangtlunna leh chhunzawmna a ni. Fitness Improvement Programme hi kum khat aia rei kalpui a ni tawh.

Mizoram Police mi leh sate'n taksa, rilru leh thlarau lam thlenga hriselna ṭha an neih theihna tur leh ṭha lehzuala hna an hlen theihna a nih beiseiin ruahmanna hi Home Minister kaihhruainaa duan a ni.

Year of Discipline hi Mizoram Police awmna hmun hrang hrangah kalpui tur a ni a, a lal ber aṭanga rank hniam ber thlengin ṭha taka zawm tura tih a ni. Mizoram Police chuan ram chhunga dan leh hrai kenkawhnah rintlak leh hlawhtling zawka rawngbawl an tum thu an tarlang.