KHAWTHLIR

OTP theih loh

Mizoram Public Service Commission chuan thuchhuah siamin, MPSC online portal chu khawlah harsatna a awm avangin one time password (OTP) chu SMS/message kaltlanga dawn theih a nih rih loh thu an tarlang. Hei vang hian departmental exam la zo (clear) lote tan dilna thehluh hun chu May 18, 2026 tlai dar 4 thleng pawhsei a nih thu an tarlang bawk.

Plastic ûm lei

Sihphir Water and Sanitation Committee chuan pawisa an khawl aṭangin May 9, Inrinni khan plastic úm (bottle) 50,000 chuang an lei. Naupang Fai Duh Pawl member-te'n an chhar khawm sa chauh an leisak a, um pakhat Re 1 zelin an lei a; Sihphir aṭanga km 10-a hlaa awm dumping ground-ah an hâl ral a ni.

Zu leh beer man

Vairengte police-te chuan May 10, Pathianni khan North Chhimluang khaw daiah truck AS-11 GC-5383 aṭangin sapzu chi hrang hrang leh beer an man a, a vaiin litre 1,560 a ni. Truck neitu leh khalhtu hriat a ni lo a, Vairengte Police Station-ah thubuai ziah luh niin, chhui mek a ni.

Rawtna sawiho

KMMTTP and Railway Impacts Study Committee chu an chairman T Lalhlimpuia, MLA hoin nimin khan Secretariat conference hall-ah an ṭhukhawm a; KMMTTP kawngpui leh rêl kawngin Mizo mipui tana remchang a siam turah mipui inbuatsaih dan tura rawtnate an sawiho. Ṭhutkhawm leh hunah mumal zawka thlirho leh an rel a ni.

Nute Ni hmang

Mamita Women & Child Development office chuan nimin khan Mamit Anganwadi Centre IX-ah Nute Ni (Mother’s Day) an hmang a, Mamit additional DC Carolyn LB Khiangte-in a hmanpui. Mother's Day pual hian fate enkawl kawnga entawn tlak thlan chhuah Zorampari, Mamit Bazar Veng hnenah chawimawi hlan a ni.

Harsatna sawiho

Krishi Vigyan Kendra, Khawzawl chuan nimin khan an hmunah Tualpui khuaa kut hnathawktu chhungkaw 21 pualin thlai chìnnaa harsatnate sawihona an buatsaih. Zirhona hi KVK, Khawzawl head Dr Malsawmkimi'n a kaihruai a, IIHR-NEH scheme kaltlangin kal khawmte hnenah thlai chi chi hrang hrang an sem nghal a ni.