CM Duha leh DoNER Secretary ten Mizorama DoNER project sawi dun

Chief minister Lalduhoma leh DoNER secretary Sanjay Jaju te chu May 10, Pathianni tlaiah khan CM Banglaah an inkâwm a, Development of North Eastern Region (DoNER) kaltlanga Mizorama hmasawnna hna thawh dan leh DoNER-a Mizoram project inchiah mekte an sawi dûn.

CM Lalduhoma chuan, DoNER aṭanga Sustainable Cultivation of Mizo Ginder USP NEC fund tur pawm a nih chungchangah a lawm thu sawiin, "Mizoramin sawhthing kan thar ṭha. Kan sawhthingte hi a ṭhain a thianghlim a, NITI Aayog chuan Ginger Capital of India-ah min puang hial. NEC fund hi sawhthing chingtute tan a ṭangkai hle dawn a ni," a ti.

Chief Minister chuan, 10% Gross Budgetary Support (GBS) mumal zawk leh langtlang zawka kalpui a nih theih nan hmalak a ṭul thu a sawi a; NESIDS (Roads) hnuaia Khankawn-Rongura hmun (km 1.70 vela thui) laih belh a nih chuan Thenzawl-Buarpui intermediate lane a pawh theih dawn avangin, laih belhna tur sum ngaihtuahpui turin DoNER Secretary a ngen.

Sanjay Jaju chuan, CM Lalduhoma ngenna chu en zuia hmalak a nih tur thu a hrilh a; Thenzawl Golf Resort tihchangtlunna atan private investor-te an luh theihna turin hmalak a tum thu a sawi bawk.