Minister-in ran talhna in a tlawh

Minister Lalrinpuii chuan nimin zing khan a bial, Lunglei East chhunga Lunglei Electric Vengah AH&Vety department hnuaia ran talhna in (slaughter house) a tlawh a; kum 2015-a hawn tawh slaughter house, hman zui loha awm chu mipuiin ṭangkai taka an hman theih nan hmalak a nih tur thu a sawi.

Lalrinpuii chuan, ran talh vangin natna hrik inkai theih tam tak a awm thu leh khaw chhunga ran talh chu a him tâwk loh thu a sawi a, "Lungleiah mihring kan pung zel a, LMC a din tâk avangin inkaihhruaina fel tak nen ran talhna hi hman ṭangkai dan ngaihtuah a ṭul. Ran talhna in hi Lunglei mipuite'n sa thianghlim leh hrisel an ei theihna atana ṭangkai tak tur a ni," a ti.

Lungleia Slaughter House hi kum 2013 khan AH & Vety department-in sa ṭanin, kum 2015-ah hman theiha sak zawh a ni a; mahse, hman ṭangkai lohin a awm zui. Bialtu MLA Lalrinpuii hian ṭangkai taka hman a nih theih nana hmalak dan turte LMC leh AH&Vety department hotute leh ran talhtute a sawipui a ni.

Minister Lalrinpuii hmalakna kaltlang-in Power & Electricity department chuan Slaughter House bulah transformer thar bun turin hma an lak nghal tur thu an sawi niin sorkar thuchhuah chuan a tarlang.