Vohbikte sorkarin a ngaihsak - Sawivunga

Ephatha Special School for the Deaf & Hard of Hearing chuan nimin khan Colege Venga RSTC-ah an sikul kum 10 tlin an lawm a; minister C Lalsawivunga, bialtu MLA-in hmanpuiin, vohbikte chu sorkarin a theihna apiangah a ngaihsak thu a sawi.

C Lalsawivunga chuan, Ephatha Special School-in kum 10 an tling ta chu a lawmpui thu a sawi a; zirlai naupangte chu vohbik an nihnate mahni indah hniam phah nana hmang lo tura fuihin, "Eizawnna in neih theihna turin ṭha takin lehkha zir u la, sorkar pawhin a theihna apiangah a ngaihsak em em che u a ni," a ti.

Ephatha Special School hi Ephatha Society of Mizoram for the Deaf and Hard of Hearing (ESOMDHH) enkawl niin, zirlai 32 an awm mek a; Indian Sign Language hmangin zaizira inbiak an inzirtir ṭhin. India rama a hmasa ber ni turin Mizoram State Commission for Protection of Child Rights nen POCSO Act chungchangah Indian Sign Language hmangin video an siam tawh.

Ephatha Special School kum 10 tlin lawmna hi ESOMDHH general secretary Jenny Lalbiaktlingi'n a kaihhruai a, ESOMDHH president Saihmingthangi pawhin thu a sawi. Vohbik naupangte'n an thiamthil chi hrang hrang an entir a ni.