Khua leh tui dik takte chhinchhiahna tur Bill pawm a ni dawn em tih a la hriat loh
March 18, 2019-a Legislative Assembly session-in a pass tawh, Mizoram khua leh tui dik takte chhinchhiahna tur 'The Mizoram Maintenance of Household Registers Bill, 2019' chu pass a nih hnua Mizoram Governor ni tawhte'n an la pawm lo a, pawm a nih dawn leh dawn loh hriat a la ni lo.
The Mizoram Maintenance of Household Registers Bill, 2019 hi pass a nih laia Governor Kumanam Rajashekharan chuan pawmpuina (assent) a pe lo a, Kumanam Rajashekharan a bàn hnua Mizoram Larsap lailâwk Prof. Jagdish Mukhi pawhin tun thlengin a la pawm lo. Prof. Jagdish Mukhi chuan Bill hi dan lam thiamte a ràwn hnuah, President Ram Nath Kovind hnenah a thawn a ni.
India ramah state governor-te'n Legislative Assembly House-a bill pass, pawmpui tura state sorkarin a thawnah kawng chi li-in thutlukna a siam thei a; chu'ngte chu - pawmpui (assent), pawmpuina pek loh (withhold assent), President pawmpui tura dah leh, state sorkara ngaihtuah ṭhat leh tura thawnte a ni.
Bill neitu GAD (General Administration Department) hotute chuan Vanglaini palai zawhna chhangin, he Bill chungchangah hian President hnen aṭangin thu dawn an la neih loh thu an sawi. The Mizoram Maintenance of Household Registers Bill, 2019 hi Governor pawmpui (assent) tura thawn a nih hnuah pawm a la nih loh chhan Mizoram sorkarah hriattir a ni lo. GAD erawh chuan Governor Secretary hnen aṭangin Governor hian dan lama mithiamte a ráwn mek tih an dawng thung.
Assembly speaker Lalrinliana Sailo chuan, Governor-in thu leh hla a neih har êm avangin, Jagdish Mukhi-a'n August 2019 tìr lama Aizawl a rawn tlawh ṭumin Bill chungchang chu a zawtfiah. Governor chuan Speaker hnenah hian, Bill chu President hnenah a thawn thu a hrilh a, "Bill hi a serious avangin thutlukna chu Central siam turin ka dah a ni," tiin a sawi a ni.
Vanglaini palai zawhna chhangin Assembly secretary SR Zokhuma chuan, an hriat theih chinah tun hmain bill pakhat chu Governor-in President hnenah a thawn tawh thu a sawi a, "Bill hi pawm zui a ni ta lo," a ti a; tun
ṭum hi Mizoram Assembly-a bill pass, President hnena thawn a nih ṭum hnihna a nih thu a sawi.
Assembly House-a bill put luh a nih ṭumin chief minister Zoramthanga chuan, dan thar hi ṭha taka kalpui a nih chuan, dan loa Mizorama lutte'n Mizoram khua leh tui dik takte chanvo an chhuhsak ṭhin a véng thei tura ngaih a nih thu a sawi a, "Hemi piah lamah hian venhimna pawh awlsam leh khauh zawka kalpui a nih theih beisei a ni," a ti.