IPR Director-in Lawngtlai a tlawh

Information and Public Relations (IPR) director K Vanlalsangi chuan nimin khan Lawngtlaia IPR pisa a tlawh a; district information officer (DIPRO) Zonunchama Ralte leh thawktute bakah, Mizoram Journalists' Association (MJA), Lawngtlai District hruaitute nen an inkâwm.

K Vanlalsangi chuan, Lawngtlaia DIPRO leh MJA inkara thawhhona ṭha tak a awm chu a lawm thu a sawi a; hma lam hunah thawhhona ṭha zawk nei zel tura chahin, "Sorkar thuchhuak dik taka thehdarh bakah, department-te hmalakna kawng hrang hrang puanzar kawngah DIPRO office hian mawhphurhna a nei lian hle a ni," a ti a; sorkar rintlaka thawk zel turin a fuih.

Lawngtlai MJA hruaitute chuan, ram leh hnam siamṭhat kawngah MJA leh IPR department ten mawhphurhna lian tak an neih thu leh, ṭhahnemngai taka an thawh dun zel tur thu an sawi.

IPR Director hian Lawngtlaia an pisa hmunhma leh buliding a enfiah a; nimin vêk khan Siahaa IPR pisa a tlawh bawk.