Damdawi-inte tihchangtlun zel tum a ni - Health Minister

Tlabung Sub-District Hospital building sak thar chu nimin khan Health minister Lalrinpuii'n a hawng. Minister chuan, sorkar damdawi-inte tihchangtlun zel tum a nih thu a sawi.

Health Minister chuan Mizorama doctor indaih lohna zualpui phuhrûk nan MBBS 20 leh BDS panga lakna atan thil pawimawhte hmanhmawh taka buaipui mek a nih thu a sawi a, "Mipuite'n an chhawr ṭangkai zawk theihna tura district hospital, sub-district hospital, CHC, PHC leh medical college te tihchangtlun zel tum a ni," a ti.

Damna duha damdawi-in pan ṭhin damlote chu taksa damna tluantling an pe thei lo a nih pawhin, rilru damna pek tuma theihtawp chhuah ṭhin turin Lalrinpuii chuan hriselna lama thawktute a chah a, "Damlo leh anmahni awmpuitute lo chhawn danah a ṭul anga inenfiah a, hmasawnna kawng zawh tum zel tum ang u," tiin, hmasawn zel tum turin a fuih.

Health Minister chuan, mipuite'n ṭangkai zawka damdawi-in an chhawr theih nan a enkawlna leh inrelbawlna lam a pawimawh thu a sawi a, "Natna zawn chhuah hna thawktu laboratory lam te, damlo enkawltu nursing lama thawkte leh doctor te, eirawng bâwltu bakah, tifaitute thlenga ṭha tak leh inpawh taka an thawhho a ṭul," a ti.

Damdawi-in hawnnaah hian bialtu MLA Prova Chakma pawhin thu sawiin, Tlabung damdawi-in sak thar leh tihchangtlun a ni chu lawmawm a tih thu a sawi.

Tlabung Sub-District Hospital hi khum 30 awmna a ni a, sak ṭhatna atan NABARD RIDF XXIX 2023-2024 hnuaiah cheng nuai 601.34 ruahman a ni. In hi Zothan Consultancy Services-in an thawk a, January 20, 2025 khan sa ṭanin, February 3, 2026-ah an zo. A chhuat awh zau zawng square metre 824.73 a ni a, chhawng hnih a ni.