MYC Chairman-in NSDC hotu a kâwm

Mizoram Youth Commission (MYC) chairman Dr Vanlalṭanpuia, MLA chuan October 30, Nilaini khan a pisaah National Skill Development Corporation (NSDC) consultant Tomio Isogai a kâwm a; Mizo ṭhalaite Japan ramah lehkha zir leh hna thawka tam zawk an inzàr pharh theih dan tur a sawipui.

Dr Vanlalṭanpuia chuan, MYC kaltlanga Mizo ṭhalai thiam thil nei ṭha tak takte'n India ram chhung leh páwnah hna ṭha zawk an hmuh theih nana ṭhalaite chher hriam chu MYC tum ber a nih thu a sawi a, "Japan-ahte thleng pawh Mizo ṭhalaite tam zawk an luh a, Zo fate huang kan zauh zel theih nan thawhhona awm se tih chu kan thil ngaih pawimawh zinga mi a ni," a ti.

Tomio Isogai hi Japanese skill trainer Kazuko Barisic leh BITS Pilani dintu Rajeev Gupta ten an ṭawiawm a; NSDC official-te chuan an hmachhawp hrang hrang leh Mizoram ṭhalaite tana ṭangkai tur nia an ngaihte an sawi a ni.

Inkawmnaah hian Mizoram University Incu­bation Centre aṭangin director Dr Laldinliana Varte, CEO KC Zorammawia leh manager Albert Lalhmingsanga te pawh an tel.