KHAWTHLIR

Thisen pe

Health Workers Training School, Kulikawn zirlaite chuan nimin khan International Nurses Day pualin an hmunah Blood donation Camp an huaihawt a; Civil Hospital, Aizawl tan thisen unit 40 an pe a, petute mipa 28 leh hmeichhia 12 an ni.

Ti ṭhate lawmpui

Modern English Higher Secondary School chuan nimin khan Vanapa Hall-ah kum 2025-26 chhunga HSLC leh HSSLC-a ti ṭhate lawmpuina an buatsaih a, minister of state F Rodingliana'n a hmanpui. F Rodingliana chuan zirlaite chu Pathian ṭih chunga an zirlaite zir chhunzawm zel turin a fuih.

Phone bo pe lêt

Khawzawl police-te chuan Central Equipment Identity Register portal hmanga tun hnaia phone bo pathum an chhui chhuahte chu nimin khan a neitute hnenah an hlan.

Hriselna lam zirhona buatsaih

State Council of Educational Research and Training (SCERT) leh Mizoram State AIDS Control Society chuan nimin khan SCERT Auditorium-ah Aizawla mimal sikul zirtirtute pualin sikula hriselna lam hawi inzirtirna an buatsaih ṭan a; MSACS project director Dr Jane Rinsangi Ralte-in a hmanpui. SCERT leh MSACS hian kum 2024 leh 2025 chhung khan Aizawl district-a private school 174 chu training an neihpui tawh a; tun ṭumah hian thupui 11 hmangin training an buatsaih leh a, ni thum a awh dawn a ni.

MHIP-in an dem

MHIP Gen. Hqrs chuan thuchhuah siamin, Mizoram Police leh Uttarakhand Police ten Mizo hmeichhiate inzawrh luihtirna hmun Beauty Queen Salon & Spa, Rudrapur luhchhuah a, Mizo hmeichhia panga an chhan chhuak chu lawmawm an tih thu an tarlang. Thil bawlhhlawh taka Mizo hmeichhia hnûk luttute an dem thu sawiin, "An phû tâwk hremna an hmuh theih nan hma kan la zel dawn," an ti. Mizoram pawna hna thawh tumte leh nu leh pate chu fimkhur lehzual turin an chah bawk.