Ngopaah total bandh huaihawt tum

Joint Action Committee on NH 102B Package 2, Ngopa chuan, National Highway 102B Package-2 siam chungchanga an ngennain vawiin May 13 thlenga awmzia a neih loh chuan May 14, naktukah Ngopaah total bandh huaihawt an tum a; bandh-in awmzia a neih loh chuan tiam chin awm loin NH-102B dan an tum bawk.

JAC on NH 102B Package 2, Ngopa chuan, NH-102B Package-2 siam mekah hna a chhia a, a nih tur ang a ni lo hle tih sawiin, "Compensation reject chungchangah te, khaw chhung kawng pêng hrang hrang laih chhiat, siamṭhat leh loh chungchangah te, kawng zau zawng a nih tur ang tling lo lutuk te, hmanrua hman chhiat lutuk chungchang leh thil dang tam takah a nih tur ang a ni lo nasa em em a ni," an ti a; an lungawi loh thu an tarlang.

An lungawi lohna hrang hrangah hma la turin NHIDCL, contractor leh Mizoram Chief Secretary hnenah ngenna an thlen tawh ṭhin thu sawiin JAC chuan, "Heng hmalakna hrang hrang hian awmzia a nei lo hle," an ti.

An ngennain May 13 thlenga awmzia a neih loh chuan May 14, 2026-ah Ngopa khuaah total bandh huaihawt an tum a, bandh-in awmzia a neih loh chuan tiam chin awm loin NH-102B kawngpui khâr/dan an tum thu an puang a ni.