MP hoin Lunglei dist-a hmalakna thlirho

Lok Sabha MP Richard Vanlalhma-ngaiha hoin nimin khan Lunglei DC conference hall-ah Lunglei District Development Coordination and Moni-toring Committee (DISHA) an ṭhu a; sorkar laipui scheme hrang hranga hnathawh dan leh hmachhawp te an thlirho.

Richard Vanlalhmangaiha chuan, sorkar laipiu scheme-te leh DISHA chu sorkar laipuiin a ngai pawimawh thu sawiin, "DISHA ṭhutkhawma rawtna lutte hi thawktute'n chak taka kan bawhzui zel a ṭul," a ti a; awmze nei zawk leh chak zawka hna thawh a nih theih nan theihtawp chhuah chhunzawm zel turin department hotute a chah.

Ṭhutkhawma tarlan danin, MGNREGS-ah Lunglei district-a khaw 106-ah job card nung 20,077 a awm mek a, kum 2025-26 chhungin ni 100 inhlawhna siam a ni. Thawh tur ruahman hna 2,772 aṭangin 2,558 thawh zawh tawh a ni a, thawh mek 214 a awm.

Lakhpati Didi hnuaia self help group member-te'n kum khata Rs 1,00,000 aia tam la lut tura hmalaknaah kum 2024-2027 atan target 2,299 a awm a, kum 2025-26 chhungin target 605 (26.31%) tihhlawhtlin a ni.

AMRUT 2.0 hnuaia cheng nuai 997.78 sênga Greater Lunglei Water Supply Scheme tihchangtlun hna thawh mek chu 87% zawh a ni tawh a, cheng nuai 795.21 senga Tlabunga WSS (Solar Pumping) tihchangtlun hna thawh mek 70% zawh a ni tawh. SBM(G) hnuaiah Lunglei district-ah ek-in (IHHL) 1,229 sak zawh a ni.

ṬHUTKHAWMA TARLANTE

■ PMGSY hnuaia Lunglei-Kawlhawk-Buarpui kawng km 66.500-a thui siam mek 16.38% zawh tawh a ni a; Phairuang-Thenhlum (Bolia thleng) kawng km 48.770-a thui leh Phairuang-Thenhlum (Bolia-Thenhlum) kawng km 16.23-a thui siam mek 46% ve ve zawh a ni tawh.

■ Lunglei DCSO hnuaiah ration card 40,369 awmin, ration card-ah mi 1,46,990 hming a chuang.

■ PMUY hnuaiah a thlawnin chhungkua 919 gas connection pek a ni.

■ Samagra Shiksha hnuaiah kum 2025-26 chhungin Lunglei district-a zirlai 9,680 hnenah uniform leh zirlai 9,735 hnenah zirlaibu pek a ni.

■ PM-POSHAN hnuaiah sikul 441-a zirlai 20,720 hnenah a thlawnin chawchhun pek a ni.

■ NSAP hnuaiah kum 2025-26 chhungin Lunglei district-ah tar châwmna (old age pension) la mi 3,643 an awm a, hmeithai (widow) pension la mi 310 leh vohbik (disability) pension la mi 99 an awm.

■ Lunglei district-a anganwadi centre 304 kaltlangin supplementary nutrition programme hmanga chawṭha dawng naupang, hmeichhe tleirawl, nu nau pai leh nau pawm mi 10,753 an awm.