Fisheries leh CYMA ten thuthlung ziak

Fisheries department leh Central YMA chuan nimin khan Fisheries minister Lalthansanga pisaah lui dung humhalh turin thawhhona thuthlung an ziak a; Fisheries department aiawhin director Zonuntluangi leh CYMA aiawhin president R Lalngheta ten hming an ziak.

Fisheries department leh CYMA hian kum 2021 aṭang khan lui dung humhalh turin kum hnih atan zel thawhhona thuthlung ṭum hnih an ziak tawh a; tunah hian a ṭum thum nan thawhhona thuthlung an ziak leh a ni.

Minister Lalthansanga chuan, Fisheries department tan lui zawng zawng vil a harsat thu sawiin, "YMA-te'n kan lui dung humhalh nachang hria a, branch-te'n theihtawpa an huam chhunga hma an lo la ṭhin hi a lawmawm. Lungrual taka kan thawhhona hian rah ṭha a lo chhuah tawh ṭhin a, kum hnih kan thawhho lehna turah hian Fisheries Acts leh Rules hnuaiah awmze nei leh ṭangkai zawka Mizoram lui dung hausakna hman kawngah hma kan sawn phah ngei ka beisei," a ti.

Thuthlung ziahnaa tarlan danin, Mizoram luia nungcha venhim leh humhalhah Fisheries department leh YMA thawhhonain nasa takin rah ṭha a chhuah a, YMA branch 93-in lui dung humhalh bik an nei. Mizorama lui hrang hrangah sangha an pun phah bakah, lui humhalh inzirtirnaah te, lui venhim leh dan phal loh hmanrua hmanga sangha man chîngte man chhuah kawngah chak zawkin hma an lak theih phah a ni.