Graduation Commencement hmang

Helen Lowry Higher Secondary School chuan nimin khan an auditorium-ah Gradua-tion Commence-ment Programme vawi 28-na an hmang a, adviser to chief minister TBC Lalvenchhunga, MLA-in a hmanpui.

TBC Lalvenchhunga chuan, zirlaite chu an kal zelnaah tumruh tur leh taima tura chahin, "In hun tawn mek hi eng stream nge thlan tur, eng hna nge thawh tur tih leh eng kawng nge zawh tur tih ngaihtuaha rilru a hah hun lai a ni a, ṭhiante leh chhungte nawrna vanga mahni tui zawng ni miah lo thlan a hlauhawm. Hlâwkna lam ringawt ngaihtuah a, mahni tuina ni miah lo kawng thlan palh chuan inchhirna a thlen thei a, hun kan khawhral thei," a ti a; ngaihtuahna sêng tam tur leh chhungkuaa sawiho ṭhin turin a chah.

Zirlaite chu harsatna hmachhawn ngam tur leh inelna sang tak hmachhawn ngam tura fuihin Lalvenchhunga chuan, "Inbuatsaihna ṭha neih a pawimawh a, chhel a ngai bawk. Beidawng mai ṭhinte hi an hlawhtling mawh hle a, vawi tam tak hlawhchham hnu pawha bei nawn zel peihte hi an lo dingchang ṭhin," a ti.

Inkhawmah hian Mizo Conference of SDA president Pastor Roding-liana khualzahawm a ni a, Helen Lowry HSS headmaster Rotluanga Tochhawng-in sikul din-hmun tlangpui a sawi.

Helen Lowry School hi January 17, 1950 khan din a ni a, Mizorama English medium school hmasa ber niin, kum 2000 khan higher secondary school-ah hlan kai a ni.