Law & Justice Minister-in Mamit a tlawh

Sorkar laipuia Law & Justice minister of state Arjun Ram Meghwal chuan Mamit a tlawh a; May 11, Thawhṭanni khan sorkar department hotute nen department hmalakna an thlirho a, nimin khan khawtlang leh pawl hruaitute a kâwm.

Sorkar hnathawkte nena an inkawmnaah Arjun Ram Meghwal chuan, sorkar laipuiin aspirational district-a Mamit district a puan chhan hriat a ṭul thu sawiin, "District hmasawn leh changkang zawk a nih theih nan hmalak zel a ngai. Sorkar laipuiin mipui hamṭhatna tur a siam central scheme hrang hrangte a dawngtu tur mipui hnena a thlen ngei theih nan inzirtirna leh inhrilhfiahna uar a ṭul," a ti.

Inkawmnaah hian central sector leh centrally sponsored scheme khawihtu department-in hma an lak dante thlir a ni a; department-in harsatna an tawhte leh an hmachhawpteah sorkar laipuiin theihtawpa hmalakpui a tum thu Union Minister chuan a sawi.

Arjun Ram Meghwal hian ṭhut-khawm zawhah Mamit District Court leh District Jail a tlawh a ni.

Law & Justice Minister hi nimin khan Mamit Tourist Lodge-ah khawtlang hruaitute leh tlawmngai pawl hruaitute nen an inkâwm a; village council hrang hrang, YMA, MHIP, MUP leh MZP hruaitute an tel.

Arjun Ram Meghwal chuan, khawtlang leh pawlte chu sorkar laipuiin theih anga puih a tum thu sawiin, "Mipui harsatna sutkian hi sorkarin a tum ber a ni," a ti a; harsatna an neihte Mamit Bawrhsap leh SP hnenah thlen hreh lo turin a chah.