International Nurses Day hman a ni

Nimin May 12 kha International Nurses Day a ni a, Mizoram hmun hrang hrangah hman a ni. Trained Nurses Association of India (TNAI), Mizoram State Branch huaihawta Dawrpui Multipurpose Centre-a hman chu minister of state B Lalchhanzova'n a hmanpui.

Aizawla International Nurses Day hmannaah hian nurse thawk lai leh châwl tawh te, nurse zirlaite leh department hrang hranga sorkar hotute an tel. Kumina Day thupui chu 'Our nurses. Our future. Empowered nurses save lives' tih a ni.

Minister B Lalchhanzova chuan, modern nursing founder Florence Nightingale chu entawn tlak leh chhuanawm a nih thu a sawi a, "Vawiina nurse-te hi Florence Nightingale hnung zuitute kan ni. A lârna leh hmingthanna ang hi kan nei ve kher lo mai thei a, mahse, amah ang khan nurse hna kan thawk thei a, entawn berah kan nei tur a ni," a ti a; nurse-te chu an nun leh hnathawhah Florence Nightingale lan chhuahtir turin a fuih.

Nurse-te inpekna chu ramin nasa takin a ṭhatpui thu sawiin Minister chuan, "Nangmahnia zir tur tam tak awm kha ṭhangtharte'n an rawn zir zel dawn a, tivul zel ang che u. Nurse-te hian in hna kaihhnawihah chhungkua leh khawtlangah harsatna in tâwk tam dawn tih ka hria, in pawimawh tehlul nen, in voice hian ngaihthlak a hlawh lo em aw ka ti," a ti a; nurse-te mamawh leh harsatnaah theihtawpa hmalakpui a inhuam thu a sawi.

International Nurses Day hmanna inkhawm hi TNAI Nursing Education Committee chairperson Dr Lalrinhlui'n a kaihruai a; khuallian hian First Aid Book a tlangzarh a ni.