Kolasib leh Bairabi khaw tana Tlawng lui tui lak dan tur enfiah

PHE chief engineer (Zone-I) Lalropuia leh chief engineer (Zone-II) K Zohmingliana te chuan tun hnai khan Kolasib leh Bairabi khaw tana Tlawng lui (Bairabi hrûl) aṭanga tui lak theih dan tur an enfiah. Tui lak theih a nih chuan Kolasib leh Bairabi mipuite chu kum 2058 thleng hnianghnar taka tui dawng thei tura beisei a ni.

Sorkar thuchhuah tarlan danin, India sorkar kaihhruainaah chuan Kolasib leh Bairabi te hi khawpui (town) an nih avangin mi pakhatin ni tin tui litre 135 an dawng tur a ni a; tun dinhmunah Kolasib tana tui lak mekna Tuichhuahen aṭangin hetiang zat tui hi pek chhuah theih a ni lo.

Ruahmanna tlang-puiah chuan, Zamuang panna lei bul vel aṭangin Tlawng lui tui pump tur a ni a; Bairabi khaw chung remchangah Bairabia luang thleng thei tur hmunah vawrh chhoh phawt beisei niin, chuta ṭang chuan Bairabiah awlsam takin tui a luang thleng dawn a ni.

Kolasib lam chu tui vawrh chhohna hmun aṭang hian Tuichhuahen Pump House awm sa bul hnaiah km 23 vela thui pipe hmangin lak a ni ang a, Tuichhuahen aṭang hian Kolasib-a Pioneer Tlangah pek leh a ni ang.

Ruahmanna hi tihpuitlin a nih chuan tuna Kolasib tui pump mek chu hluihlâwn chuang loin, a pahniha hmang kawpin Kolasib leh Bairabi mipuite chu kum 2058 thleng hnianghnar taka tuia châwm theih beisei a ni a; project atan a tlem berah cheng vbc 205 vel mamawh tura duan chhin a ni.