Sangauah CMTC leh GRC hawng

Rural Development & Administration minister Prof. Lalnilawma chuan nimin khan Sangau khuaah Community Managed Training Centre (CMTC) leh Gender Resource Centre (GRC) a hawng.

CMTC leh GRC hi January 15, 2025 khan cheng nuai 25 sênga sak ṭan niin, August 2025-ah sak zawh a ni a, a chhung cheina atan Rs 8,50,000 sên a ni. Centre-te hi Far Pak Cluster Level Federation (self help group)-in an enkawl dawn a ni.

RDA Minister chuan, CMTC leh GRC te chu Sangau RD Block tana hmasawnna thlentu a nih a beisei thu a sawi a, "A taka chhawr ṭangkai thiam a ṭul dawn. Sorkarin khawtlang tan thil ṭha tak tak a siam ṭhin a, chutihrualin, a enkawl zuinaah hmasawnna a awm lo ṭhin. Enkawl lamah ṭhahnemngaih a ṭul a, a bik takin Far Pak Cluster Level Federation hian duat leh hmangaih taka a n enkawl a ṭul dawn a ni," a ti.

Nu hote chu khawtlang leh ram tan theihtawp chhuah zel tura chahin Prof. Lalnilawma chuan, "Self help group-te'n an thil thar/siamte man man zawka hralh a nih theih nan sorkarin theihtawp a chhuah reng a, ei leh bar kawnga intodelh a pawimawh a ni," a ti a; Sangau RD Block hnuaia SHG-te chu ngaituahna thar nen theihtawp chhuaha thawk zel turin a fuih.

Khualzahawm Dr Lorrain Lalpekliana Chinzah, Lawngtlai East bialtu MLA pawhin thu sawiin, CMTC leh GRC chuan khawtlangah hmasawnna a thlen ngei a beisei thu a sawi.