Aizawlah Florist Fair buatsaih mek

Mizoram Florist Association chuan nimin aṭang khan Aijal Club Park-ah Florist Fair an buatsaih a, Horticulture additional director Lucy Zaithangpuii'n a hawng. Fair hian May 15, 2026 thleng a awh dawn a; stall 93 awmin, pangpar leh a kaihhnawih hmanrua chi hrang hrang zawrh a ni.

Fair hawnna inkhawm chu Mizoram Florist Association president Lalnuntluangi'n a kaihruai. Lucy Zaithangpuii chuan, hmun hrang hranga Mizoram Florist Association member-te hmalakna chuan Mizoram hmel a tihmawi thu leh chhuanawm a tih thu a sawi.

Mizoram Florist Association hi kum 1997-ah din a ni a, branch 23-ah member 400 vel an awm mek. Tun hnai khan kum 2026-2028 chhunga hruaitu tur an thlang a - president atan Lalnuntluangi, senior vice president atan Lallawmchhungi, vice president atan Vanlalzawni, general secretary atan RK Vanlalchhuangi, secretary atan Liansangpuii, joint secretary atan Lalruatfeli, assistant secretary atan Helen Lalrinsangi Ralte, treasurer atan Darkhumi leh finance secretary atan Robuangi te an thlang a ni.