Rashtriya Ekta Diwas hman a ni

Nimin zing khan India ram hmun dangte ang bawkin Aizawlah leh district khawpuiahte Rashtriya Ekta Diwas (National Unity Day) hman a ni a, kal khawmte'n thutiam an chham rual. Rashtriya Ekta Diwas hi Sardar Vallabhbhai Patel pian champha, October 31-ah kum tin hman a ni ṭhin.

Rashtriya Ekta Diwas hi Aizawlah chuan Lammualah hman a ni a, deputy chief minister Tawnluia khuallian a ni. Zing dar 7-ah Sikulpuikawn leh Chanmari kâwn aṭangin Unity Run neih a ni a, zirlai ṭhahnem tak telin, Lammual an pan khawm a; Lammuala an thlen khawm hnuah inkhawm ṭan a ni.

Deputy Chief Minister chuan, India hnam inpumkhatna atana nasa taka hma latu Sardar Vallabhbhai Patel pian champha October 31 chu India sorkarin Rashtriya Ekta Diwas (Hnam Inpumkhatna Ni) atan a puang tih a sawi a, "Kum 2014 aṭangin Rashtriya Ekta Diwas hi hman ṭan a ni a, vawiin hi vawi ruk hmanna a ni," a ti.

Tawnluia chuan, kum 1917-ah Sardar Vallabhbhai Patel chuan India hnam pa Mahatma Gandhi thusawi a ngaihthlak aṭangin India hnam tan theihtawp a chhuah tih sawiin, "Huaisen taka thawk mi, 'Iron Man of India' tih hiala koh 

ṭhin a ni. British-in India an chhuahsan dawn khan India lal ram hrang hrang 500 chuang India chhunga an awm khawm theih nan hma a la a ni," a ti a; Sardar Vallabhbhai Patel anga hnam inpumkhatna atana theihtawp chhuah turin mi tinte a sáwm.

Inkhawmah hian chief secretary Lalnunmawia Chuaungo kaihhruaiin kal khawmte'n Rashtriya Ekta Diwas thutiam an sawi rual a; Assam Riffles, BSF, 1st Battalion MAP, 3rd Battalion MAP, 5th IR Battalion, Mizoram Home Guard, 225 Battalion CRPF, 1 Mizo Air Squadron NCC leh 20 Mizo Independent Company NCC-te'n sipai lâm (parade) an entir a ni.

Rashtriya Ekta Diwas hi Mamitah chuan Dis­trict Education Office huaihawtin hman a ni a, Charkawn aṭanga Mamit High School thleng Unity Run huaihawt niin, zirlai naupang ṭhahnem tak an tel. District bawrhsap Dr Lalrozama'n thu a sawi a, Mamit H/C headmaster Hmartawnluaia kaih­hruai­nain thutiam sawi rual a ni.