Police-in bank account hmanga Inbumna laka fimkhur turin ngen

Mizoram Police chuan thu­chhuah siamin, tunlai hian bank account hmanga inbumna a tam thu an tarlang a, fimkhur turin mipui an ngen.

Police thuchhuah tarlan danin, bank customer-te'n link, phone call, SMS emaw, Whatsapp message hmangin bank account-a pian ní dik lo siamṭha tur leh, bank account update tura tihna/hriattirna an dawng ṭhin a; bank account hmanga mi bum chíngte chuan customer-te ATM number, PIN leh OTP-te an zâwt ṭhin bawk. Chutianga bank account update tura tihna pop-up/call/SMS/Whatsapp message/link chu bank account hmanga mi bum chíngte tih a ni ṭhin.

Mimal bank account chung­chang zawhna - link, pop-up, email, SMS leh phone call-te chháng lo tur leh mobile number, password, ATM number-te phone, email leh SMS hmanga mi bum chíngte hrilh loh turin police-te chuan mipui an ngen a, "Bank-te hian hetiang information hi phone call leh sms hmangin an zâwt ngai lo. Mimal chungchang leh bank account chungchangte pop-up, link, email, sms leh call hmangtea hrilh lo tur leh mi bum hmangte laka fimkhur turin mi zawng zawng ngen leh hriattir kan ni e," an ti.