KHAWTHLIR

Mizoram Governor thar tur PS Shreedharan Pillai chu November 5, 2019 chawhma dar 11:30-ah Raj Bhavan tualah rinawmna thu tiamtira lak luh a ni dawn. Larsap lak luhna inkhawm neih dan tur hi chief secretary Lalnunmawia Chuaungo hoin sorkar official-te'n October 30 khan an ngaih­tuah a ni.

Mizoram Assembly deputy speaker Lalrin­awma chuan October 30, Nilaini zan khan R Dengṭhuama Indoor Stadium, Aizawlah Mizoram Volleyball Association buatsaih Inter-Village Volleyball Tournament, 2019 final a hmanpui. Lalrinawma chuan, Mizote'n inngaihsan tawnna an tlachham ṭhin tih sawiin, "Thil thuhmun, thiamna inang rengah kan hnampui Mizote aiin hnam dang kan ngaisang zawk fo. Kan hnampui ngei ngaisangin kan dah hlu zawk ṭhin tur a ni," a ti. Intihsiaknaah hian mipaah Maubawk LC leh hmeichhiaah Kolasib Diakkawn VC an champion a ni.

Lawngtlai District Village Council Association chuan October 30, Nilaini khan CYLA Hall, Lawngtlaiah General Conference vawi 4-na an hmang a, Agriculture Development Board vice chairman H Biakzauva'n a hmanpui. LADC sorkara LAD-in V/C hna thawk ṭha bera an thlan khawpuiah Lawngtlai Bazar Veng V/C leh thingtlangah Diltlang V/C hnenah chawimawina a hlân. H Biakzauva hian V/C-te chu dan hriatna lamah hmasawn tum tur leh mi hmuhah holam taka inthuam/inchei lo turin a chah a ni.

Mizo Academy of Letters joint headquarters, Lunglei chuan nimin khan YMA Sub-Hqrs. Lunglei Conference Hall-ah 'Lalzova leh F Rokima sûlhnu zirhona' tih hmangin state level seminar an buatsaih a, Legislative Assembly speaker Lalrinliana Sailo khuallian a ni. Lunglei district-a MLA pahnih Dr K Pachhunga leh Lawmawma Tochhawng bakah, Lunglei DC K Lalrinzuali leh SP C Lalthanmawia te pawh an tel a; tlawmngai pawl hruaitu te, Lalzova leh F Rokima thlahte leh zirlai ṭhahnem tak an kal khawm a ni.