Advertisement chhuah loin thawktu 91 lâk a ni tih Education Minister-in a pawm - MPCC

Mizoram Pradesh Congress Committee (MPCC) chuan nimin khan thuchhuah siamin, School Education minister Lalchhandama Ralte-in SSA leh RMSA hnuaiah advertisement chhuah loin thawktu mi 91 lâk a ni ngei tih a pawm chu lawmawm an tih thu an tarlang.

MPCC Media department chuan, SSA leh RMSA hnuaia advertisement chhuah loa thawktu 91 lak a nih dan School Education Minister-in a sawifiah chuan MNF party hruaitute leh mipui náwlpui hriat lohin SSA leh RMSA - Samagra Shiksha-ah duhsak zawng leh chhungkhat laina hnaite thun an ni reng tih a tihchian thu an sawi a, "Amah hre chiangtu MNF hruaitute leh an party mite'n MR zirtirtu 881 lak danah a laka rinna an nghat ngam lo leh zirtirtu lak dan ennawnna tur order Hnam Run aṭanga an chhuah hi a lo âwm reng a ni," an ti.

MPCC chuan, "Document engkim awm reng chunga zirlaite leh mipui hmaa dâwt sawi hreh miah lo minister kan nei hi a vanduaithlak hle," an ti a; October 28, 2019-a MZP-in Zirlaite Ni an hmannaah minister Lal­chhandama Ralte-in, 'Education Minister-in a duhsak zawng a la lo.... SPD hnenah ka ziahsak mai a ni, ka laktir tumah an awm lo' tia a sawite chu zirlaite hmaa dâwt sawina a nih thu an tarlang.

MPCC Media tarlan danin, School Education Minister-in, 'Ani hi special-a kan ngaih pawimawh a ni a, ...Physical & Health Instructor-ah lak ni se. Lungpher khuaah attached dan lo dappui ta che,' tih te, 'Ani hi ka duhsak tak a ni a, RMSA High School remchangah zirtirtu atan lak a ṭha hle mai,' tihte, 'Hei hi lo appoint ta che, special case a ni e,' tihtein a duhsak zawngte dilnaah a ziahsak a ni.

Congress party chuan, RMSA zirtirtu tur mi 40 lakna tura advertisement tihchhuahah mi 32 chauh lâk an ni a, chumi ṭuma tling zo lo mi eng emaw zat a duhsak zawngte direct-a thun leh si-ah minister Lalchhandama Ralte an puh a, "Hetiang a nih chuan MR teacher 881 laknaa tling zo lote zinga a duhsak zawng leh a chhungkhat lainate a rûkin a thun leh ṭeuh mai ang tih a hlauhawm hle," an ti.

School Education Minister-in Congress ministry thil tih dan a zui duh tak tak a nih chuan, zirtirtu dang lakna zawng zawng chu MPSC kuta dah vek turin an phût tih sawiin MPCC chuan, "Sorkar hmasa ang khan MPSC hi a nihna tur ang takin hmang ṭangkai leh rawh se," an ti. SSA leh RMSA hnuai­a awlsam taka hnawhkhah theih post ruak a hnawhkhah tawh zat te, post ruak hnawhkhah tur la awm zat, RMSA school thara post awm zatte hi chiang taka mipui hmaa puang chhuak turin an phût bawk.