LESDE Minister-in mi chhawr duhte leh hnathawktute indawrna tur a tlangzarh

Labour, Employment, Skill Development and Entrepreneurship (LESDE) minister Lalnghinglova Hmar chuan nimin khan LESDE auditorium-ah mi chhawr duhte leh hnathawktute indawr tawnna tur mobile application 'Mizoram Labour Link' a tlangzarh.

Lalnghinglova Hmar chuan, thiamna ṭhang zel ban pha loa awmte chu mi dangin an tlansan zel dawn tih sawiin, "Thiamna ṭhang zelah hian kan phak tawka tel ve zel a ṭha. Mizoram hian thil tam takah hnufualna kan nei a, a bik takin digital infrastructure-ah ṭan kan ngai," a ti.

Hmasawnna chu infrastructure lian pui pui din ringawt a nih loh thu sawiin Minister chuan, "Tunlai khawvel intlansiakna ber, hmasawna min thlen theitu ṭangkai tak chu digital infrastructure a ni," a ti a; thiamna tihpunna leh hna daihzaihna chu digital world-ah a awm thu a sawi.

LESDE Minister chuan, nasa taka hma an lak zarah an department chu miin an hriat ve zel thu sawiin, "Hna thawktute hamṭhatna atan central leh state sorkarin ruahmanna a siam a, pawisa a awm tih hria se kan duh. Hnathawktute'n an chanvo an hriat theihna atan theihtawp kan chhuah," a ti.

Lalnghinglova Hmar chuan, hna thawktute'n an chanvo an hriat theih nan mipuiin an ngaihven leh kal tamna event-ah sponsorship leh partnership anga an tel ṭhin thu sawiin, "Hna thawktute'n an chanvo an hriat theihna atan kan la chhunzawm zel ang," a ti a, hna thawktu inziak lut an pun zel thu a sawi.

Mizoram Labour Link tlangzarh-naah hian LESDE director John Ṭanpuia'n application tlangzarh tak nihphung leh ṭangkaina turte a sawifiah. Application hi LESDE leh ICT department ten an siam niin, tihchangtlun zel tum a ni a, Playstore aṭangin lak theih a ni.

MIZORAM LABOUR LINK

✓ Pawn lam mi (middlemen) inrawlhna tihtlem.

✓ Hna thawh tur zawnga hmun him lo laia worker/labour-te fuan khawm tihbo.

✓ Ni tina inhlawh ṭhinte'n an thawh hlawh dik tak (fair wage) langtlang taka an hmuh theihna.

✓ Hna zawng lai (worker) leh a chhawr theitu tur (employer) inziah luh theihna.

✓ Hna tar chhuah (job posting) theihna leh dil theihna.

✓ SMS leh push notification hmanga inhriattir theihna.

✓ Hna zawngtu leh hnathawh tur neitu inbiakpawh theihna.

✓ Awmna hmun azir leh thiamthil azira hna zawnna leh tarlanna.