Dr LN Tluanga Science Award hlan

Mizoram Science Society (MSS) chuan nimin khan Aizawl Hospital & Research Centre-a enkawl mek Dr LN Tluanga, Mission Veng hnenah Mizoram Science Award hmasa ber an hlan.

Mizoram Science Award hi Mizo zinga science lama khawtlang leh ram tana hnuhma nei ṭha te, scientific research lama mi hmingṭha leh thawh hlâwkte hnena hlan ṭhin tura duan niin, thuchei leh Rs 50,000 a keng a; kumin hi an vawi khat hlanna a ni. Dr LN Tluanga hi Aizawl Hospital-ah enkawl mek a ni.

Dr LN Tluanga hi kum 1933 khan Bukpuiah piangin, a naupan laiin Sialsuk leh Aizawlah lehkha a zir a; Scottish Church College, Kolkata aṭangin kum 1955-ah B.Sc (Mathematics) a zo. MSc a zawh leh hnuah, kum 1974 khan Gauhati University aṭangin PhD a zo a, Mizo zinga Mathematics-a PhD hmasa ber a ni.

Mizoram sorkarah Education director hmasa ber a ni a, Education department-ah vêk hian consultant/adviser hna a lo chelh tawh. Science tihhmasawnnana turin nasa takin a thawk a; a hoin kum 1979 khan Mizoram Science Society hi din a ni.