Miin thawhpui tlak ruahmanna a neih chuan kan thawhpui zel dawn - CM

Chief minister Lalduhoma chuan Bána Kaih (Handholding) kaltlangin sangha dil siama eizawng mi 247-te bánah an kaih tawh thu a sawi a, "Miin thawhpui tlak ruahmanna an neih chuan kan thawhpui zel dawn," a ti.

Fisheries department chuan nimin khan Dawrpui Multipurpose Hall-ah Mizorama sangha khawitute intawhkhawmna, Mizoram Fish Farmers' Meet an buatsaih a; khuallian Chief Minister chuan, "Bâna Kaih thawh khatnaah CM Special Package aṭangin mi 201 leh loan component hmangin mi 14-te bánah kan kai a, a thawh hnihna nikum September thlaah kan ṭan a, CM Special Package hmangin mi 27 leh loan component aṭangin mi panga kan thawhpui leh tawh," a ti a; ruahmanna nei ṭhate chu sorkarin a thawhpui zel dawn thu leh, dilna hun hawn reng a nih thu a sawi.

Lalduhoma chuan, Bána Kaih kaltlanga sangha dil siamtute'n an thawk ṭha thawkhat tih sawiin, "Sangha tharte bazarah awlsam taka kan hmuh theih nan chain cold storage facility tam thei ang ber neih kan tum dawn," a ti.

Chief Minister chuan, Mizoramah sangha khawi theihna ram hectare 24,000 vela zau a awm thu sawiin, "Chu'ng zinga hectare 6,000 (25%) velah sangha dil kan nei mek," a ti a, sanga dil siamah ṭan lak a ṭul thu a sawi.

Fisheries minister Lalthansanga pawhin thu sawiin, "Fisheries department hi mumal lehzualin kan kal ṭan a, induhsakna hmanga ṭanpuina inpek ṭhin tihbo tumin kalphung thar kan siam. A phúte chauhin sangha khawi ṭanpuina dawng se kan duh," a ti.

Intawhkhawmah hian district hrang hranga sangha khawitu hlawhtlingte hnenah Best Fish Farmer Award hlan a ni a; bank aiawhte'n sangha khawitute tana loan lak theih dan an sawifiah a, sangha enkawl dan zirhona a ni bawk.