RDA Minister-in Lawngtlai DPRC a hawng; Hmasawnna ngai pawimawh turin VC-te a fuih

Rural Development & Admi-nistration minister Prof. Lalnilawma chuan nimin khan Lawngtlai Dis-trict Panchayat Resource Centre a hawng a; mahni hmasialna dahṭha a, khawtlang hmasawnna ngai pawimawh turin a fuih village council member-te a chah.

DPRC hi Rashtriya Gram Swaraj Abhiyan hnauaia sak a ni a, office leh hostel sakna atan cheng nuai 100 ve ve hman a ni.

Prof. Lalnilawma chuan, DPRC chu VC-te'n an hman ṭangkai tur a nih thu leh VC-te inkarah thawhhona ṭha a awm a ṭul thu sawiin, "Khawtlang enkawlah mawhphurtu ber an nih angin, mahni hmasialna dahṭha a, khawtlang hmasawnna ngai pawimawh ber chunga thawh a ṭul. Hnathawh kawng hrang hrangah rintlak leh chhuanawm taka thawh a pawimawh," a ti.

Faina leh thianghlimna lamah ṭan lak thar a ṭul thu sawiin Minister chuan, a bik takin bawlhlawh sâwngbâwl kawngah mawhphurhna la ngam turin VC-te a chah a; "VC-te'n mahnia thawh chhuah neih ve a tul," tiin, sum thawk chhuak tura ngaihtuahna siam thiam turin a chah. Hna ṭha thawk tura mahni intiam ngam tur te, sorkar department-te thawhpui thiam turtein a chah bawk.

Khualzahawm Dr Lorrain Lalpekliana Chinzah, MLA pawhin thu sawiin, DPRC hmang ṭangkaitu tur VC-te chu neitu thinlung pua hmasawnna atana hmang ṭangkai turin a fuih a; Lawngtlai district-a VC tinte chu khawtlang leh ram tana thawhpuiah a sawm. Minister leh MLA te hian VC 15 hnenah computer an hlan nghal a ni.