Technology leh social media hmang thiam turin Minister-in zirlaite a chah

Minister of state Lalnghinglova Hmar chuan, nimin khan Ephraim Higher Secondary School-in kumin HSLC leh HSSLC-a hlawhtlingte Vanapa Hall-ah an lawmpuina a hmanpuinaah thu a sawi a; technology leh social media hmang thiam tur leh Zo nun ze mawi vawng nung zel turin zirlaite a chah.

Lalnghinglova Hmar chuan, Zo nun ze mawi - aia upa zah thiamna vawng nung zel turin zirlaite a fuih a, "Khawi hmunah pawh kal ila, kan thinlungah pi pu chena kan ro hlu Zo nun ze mawi, aia upa zahna leh mi dangte nena inzah tawnna kan vawng nung reng tur a ni," a ti.

Tunlaia internet leh social media khawvela seilian ṭhalai an vanneih thu a sawi rualin Minister chuan, "Harsatna tam tak erawh kan tâwk thei," a ti a; technology leh social media hmang thiam tur te, hriselna ngai pawimawha, mahni inthunun tlat tur te, an zirna ngai pawimawh tur leh mahni chhungkaw dinhmun leh phak tâwk hre chunga khawsak thiam turtein zirlaite a fuih.

Lalnghinglova Hmar chuan, Mizote pian pun a ṭul thu sawiin, "India rama nau piang zat fertility rate 2.1 a nih laiin, Mizoram chu 1.87 chauh a ni a, India ram mipui zawng zawng za zela chhûtin Mizoram population 0.09% chauh kan ni. Kan population hniam lutuk hian Mizo hnam dinhmun a nghawng nasa thei dawn a, tunlai ṭhangtharte'n rilru thar kan put a pawimawh," a ti.

Minister hian kumin HSLC leh HSSLC-ah Ephraim HSS-a zirlaite an hlawhtling vek chu ropui a tih thu sawiin, zirlaite chu an kal zelna turah duhsakna a hlan.

Kumin hian Ephraim HSS-in HSLC-ah zirlai 163 leh HSSLC Arts-ah zirlai 99 neiin, an pass vek a; HSLC English subject-a ti ṭha ber Joanna Lalzuimawii chu an zirlai a ni.