Chiahpui-in V/C ṭha ber nih an lawm

Chiahpui khua chuan kum 2018-19 chhunga Mizorama village council ṭha bera thlan an nih chu nimin khan an khaw community hall-ah an lawm a, LAD minister K Lalrinliana khuallian a ni a, bialtu MLA L Thangmawia, Human Resources Development Board vice chairman chu khualzahawm a ni.

LAD Minister chuan, LAD-in Mizoram puma V/C a enkawl 534 zing­a hna thawk ṭha bera Chiahpui thlan a ni chu a lawmpui thu sawiin, "Hlawh­tlinna chang tur chuan khawtlang mipui an fel a, an hruaitute an fel a ngaih bakah, inrin tawnna leh thawhhona ṭha an neih a ngai a, thawhrimna nen theihtawp an chhuah tlan a ngai a ni," a ti a; khawtlang hruaitute chu an inthlak hunah pawh khawtlang hmalakna ṭha leh thawhhona ṭha chhawm nung zel turin a chah.

Minister K Lalrin­liana hian Chiahpui V/C hnenah lawmpuina sum leh computer a hlân a ni.

Bialtu MLA L Thangmawia pawhin thu sawiin, "V/C ṭha ber ni tura khawtlang ṭan­rualna leh thawhhona ṭha chu a entawn tlak a, bial enkawltu nih pawh in­chhuanna tham a ni," a ti a; Chiahpui khawtlang chu inthlahdah lo tur leh hmasawn zel tum turin a fuih. FCSCA minister ni bawk K Lalrinliana hian Ngopa leh NE Khawdungseia a department enkawl hmalakna hrang hrang leh Ngopa park siam mekte a tlawh bawk.