UPSC Grooming Scheme hawng

Education minister Dr Vanlalthlana chuan nimin khan a pisaah all India service leh central service exam tura rilru leh taksa insawizawina tura duan UPSC Grooming Scheme a hawng. UPSC Grooming atan hian HSLC 2025-a mark 405 hmu chin zinga mi 10 thlan an ni.

Dr Vanlalthlana chuan, sorkar laipui an dawr chânga Mizo hmel hmuh tur a awm mang lo chu a khawharthlak thu a sawi a, "Kan ram ṭhalaite hian India ram inelna sang ber hmachhawn tur hian kan thei a ni," a ti a; UPSC Grooming atana hma latu MBSE hotute leh Mizoram Educational Reform Committee te chungah a lawm thu a sawi.

UPSC Grooming atan hian MBSE chuan HSLC 2025-a mark 405 hmu chin tan written exam leh personal interview an buatsaih a, mi 10 thlan an ni. Grooming Scheme hi MS Academy, Khatlaah kalpui a ni dawn a, kum tin tih tum niin, mi 10 thlan chhuahte chu kum nga chhung tuaihriam an ni ang.