Coimbatore-a hna thawh tur hriaa insawi leh inzuarte lakah fimkhur turin Mizo mipui chah

Coimbatore Mizo Welfare Association (COMWA) chuan thuchhuah siamin, Coimbatore-a hna thawh tur hria nia insawi, social media leh platform hrang hranga hna zuarte lakah fimkhur turin Mizo mipui an chah.

COMWA chuan, Coimbatore-a hnathawh tur hria nia insawi ṭhinte lakah fimkhur a ṭul thu tarlangin, "Social media leh platform hrang hrang aṭanga hna zuarte lakah te, agent lakahte fimkhur tur a ni. Hnathawhna tur hmun te, hlawh te, a him leh him loh thlenga dílchhût taka zir chiang phawt turin kan inchah," an ti.

Agency leh ràlkhat aṭanga hna thawk tura mi thawn ṭhinte chu an naute an thawhna hmunah thla thum hlawh an lak thleng tal buaipui zui turin COMWA chuan ngenin, "Nu leh pate'n kan naute an hnathawhna tur rintlak a ni em tih fiah hmasa phawt turin kan inngen bawk," an ti a; hnathawhna turte nen ziakin agreement neih ngei a ṭhat thu an sawi.

COMWA chuam, Coimbatore-a Mizo awmte chu Mizo nun ze mawi vawng nung tlat tur leh, hnam dang nena kan khawsakhonaah zâwldawh leh hawihhâwm taka awm turin an chah bawk.

COMWA THUCHHUAK DANG

☑ Coimbatore-a Mizo awm turte leh awm mekte Welfare-ah inziak lut vek turin kan inhriattir a; inziak lut duh lo leh ngai pawimawh lote chu an chungah harsatna a thlenin COMWA-in mawh a phur lo ang.

☑ Zu leh ruihhlo kaihhnawih vanga buainaah COMWA a inrawlh thei lo. Zu leh damdawi ruih/tih chíng chu rawn inthawn/kal lo turin kan inhriattir a ni.

☑ Zirna vanga rawn awm turte'n COMWA hruaitute a zawhfiah theih reng.

☑ Aadhaar card phone nena link a, soft copy print out mai theiha dah tur leh ID card dang leh document mumal tak nei turin kan inhriattir.

☑ Bank account leh ATM card nei ngei tur leh, a theih chuan internet banking ti ngei turin kan inngen.

☑ Coimbatore-a in luah turte'n hnam dang in luah kan nih angin, kan awm dan leh khawsak danah te, inléng neih kawngah te in neitute zah thiam tur a ni a; Mizo hming tichhe zawnga khawsa lo turin kan inhriattir.

☑ Coimbatore-a Mizo awm te, kan hun neih dan azirin COMWA thil tihah leh Mizo inkhawmnaah a tam thei ang ber tel turin kan insáwm a ni.