AR sipaite'n Zote VCP an man avangin Zote mipui an thinrim

May 12, Thawhlehni zan dar 8 vel khan 14th Assam Rifles sipai, Zote bul Ngúr kâwna duty-te'n Champhai Zote VC President leh mi dang pakhat an man a; hei vang hian Zote khawtlang mipui leh AR inkarah boruak ṭha lo a inmun a, buaina lian tham erawh a chhuak lo.

Champhai Zote VC president K Zosangliana sawi danin, Zote VC member Vanlalhruaia Sailo leh Lalhriatrenga te ramkal haw lam chu Champhai aṭanga Ngúr panna kawng, Ngúr kâwna 14th AR duty, uniform inbel lo, silai leh chem kengte'n manin an phuar bet a; Vanlalhruaia Sailo chu kut an thlak avangin a lú-ah na vak loin a hliam.

Lalhriatrenga'n an thil tawn chu an khaw VC secretary Lalmuan-awma hnenah phone-in a hrilh a; Zote khawtlang thinrim chu inṭuk khawmin, Ngúr kâwn an pan a; mahse, boruak chhe zawk a thlen hmain khawtlang hruaitute'n an khap thei a ni.

Zote mipui chuan an khaw bul hnaia 14th AR-in duty post an neih mek chu ṭhiat tur leh duty post chhuahsan turin Assam Rifles an phût a; 14th AR pawhin May 12 zan khan an bungrua leh thil pawimawhte an thiar chhuak nghal. Duty post building leh puan-inte erawh chu Champhai police-te'n an veng zui a ni.