MNF-in Manipur-a Zo hnahthlak Pastor 3 kah hlum pawi an ti

MNF party chuan thuchhuah siamin, Manipur-a Zo hnahthlak pastor pathum nimina kah hlum an ni chu pawi an tih tak zet thu an tarlang a, "Thinlung takin he thihna lo thlenga thite hi MNF chuan a sún a, pawikhawihtute'n an phû ang ngei hremna hmu se kan duh," an ti.

MNF tarlan danin, Churachanpur aṭanga Kangpokpi pana Thadou Baptist Association hruaitu, lirthei pahniha kalte chu Kangpokpi district-a Kotzim leh Kotlen khaw inkarah kah hlum an ni a, mi dang pali an hliam. Pastor thite chu - Rev. Dr Vumthang Sitlhou, Rev. Kaigoulun Lhouvum leh Rev. Pao-goulen Sitlhou te an ni.

Manipur-ah boruak ṭha a awm chhoh mek laia thil duhawm lo a thleng leh chu pawi an tih thu sawiin MNF chuan, "Hliam tuarte ṭha chhuak leh ngei turin duhsakna kan hlan. Hetianga Pathian mi, sakhaw puithiamte chungah kutthlak a ni hi kan hrethiam lo hle a, a pawi kan ti tak zet. Manipur-ah Zo hnahthlakte inkarah leh hnam hrang hrang inkarah remna tluantling awm se, tih hi MNF duh dan a ni," an ti.