Max Super Speciality Hospital-in Aizawlah Neurosurgery OPD hawng

Max Super Speciality Hospital, Saket, Delhi hotute chuan nimin khan Emerald Hotel-ah thuthar thehdarhtute an kâwm a; associate director Dr Anurag Gupta chuan, Damdiai Healthcare, Khatlaah Neurosurgery OPD an kalpui ṭan thu a puang.

Neurosurgery-a head ni bawk Dr Anurag Gupta chuan, Damdiai Healthcare-ah hian thla tin Nilaini vawi hnihna apiangin tlai dar 4-7 inkarah inentir duhte tan Max Super Speciality Hospital doctor-te hmuh theih an nih dawn thu a sawi. Max Super Speciality Hospital, Saket hi Mizoram Universal Healthcare Scheme zawmtu a ni.

Dr Anurag Gupta chuan, Aizawla an OPD kaltlangin thluak leh hnungzáng zai ngaite an buaipui theih dawn thu a sawi a, "Thluak leh hnungzang zai kawngah te, thluaka báwk khirh tak tak enkawlnaah leh 'minimally invasive techniques' (vuna hliam siam tlemna) zawnga zaina kawngah te hma kan la ṭhin a, kan thupui ber chu damlo tana him leh chiang zawka enkawlna pek a ni," a ti.