Beichhua'n lei tlakhniamna hmunte a enfiah

Minister of state Dr K Beichhua chuan nimin khan a bial, Siaha khawpuia lei tlakhniam ṭhinna hmun (sinking area) hrang hrangte leilung lam chanchin hre mite hruaiin a tlawh.

Sorkar thuchhuah tarlan danin, Dr K Beichhua hian Ministry of Home Affairs-ah Mizoram Home minister Lalchamliana hriatpuinain Siaha district tan project lian pathum - district jail sak ṭhat, Amotlah leh Darzokai inkar kawngpui sial leh Siaha khawpuia sinking area-te chinfelna tura ruahmanna a thlen a ni.

Project pathum zinga tihpuitlin hmasak ber tura a duh, lei tlakhniamna hmunte chinfel chung­chang bawhzuiin nimin khan Siaha khawpuiah endik hmasakna (sinking area preliminary observation) neih a ni a, Siahaa lei tlakhniamna hmunte enfiah a ni.

Enfiahnaah hian Di­saster Management & Rehabilitation (DMR) senior consultant Dr H Lallenmawia, Geological Survey of India (GSI)-a geologist Kenneth Chakma, Mizoram University-a assistant professor Dr J Malsawma leh Zofa Consultancy Services-a mi Lalbuatsaiha Hnamte te an tel.