Kuminah Champhai district-ah Ram hectare 2,883.35 a kâng

Kumin January aṭanga October thla thlengin Champhai district-ah hmun 111-ah ram a kâng a, ram hectare 2,883.35-a zau a kâng chhia anga chhût niin, ram kâng tam ber chu lo hâlnaah a ni.

Satellite Mapping Data leh Environment, Forest & Climate Change (EFCC) department spot verification-in a tarlan danin, kumin 2019 chhungin Champhai district chhungah ram kâng tum 111 awmin, ram hectare 2883.35-a zau a kâng chhia a; ram kâng tam ber chu lo hâl  niin, lo ṭum 96 hâlah ram hectare 2803.55 a kâng. Lo hâlna aṭanga vau kâng kai ṭum ruk awmin, chutah chuan hectare 8.70-a zau a kâng a; ram palailéng kâng ṭum sarih chhinchhiahah hectare 21.10-a zau leh Forest ram kâng ṭum hnih awmah hectare 50-a zau a kâng bawk.

October 30, Nilaini khan Champhaia IPR Conference Hall-ah district bawrhsap Alexander V Chawngthu hoin Champhai District Fire Prevention Committee an ṭhukhawm a; chutah chuan kumin chhunga Champhai district-a ram kâng dinhmun hi an tarlang a ni.