HM-in PTS-ah ruhrel thar a hawng

Home minister K Sapdanga chuan Police Training School (PTS), Thenzawla hmasawnna ruhrel din tharte nimin khan a hawng.

Minister-in a hawn tâkte chu PTS gate pui siam thar te, Digital Laboratory, Indoor Gymnasium leh Indoor Firearms Training Simulator te a ni a; Assistance to States & UTs for Modernisation of Police scheme hmanga Mizoram sorkar puihnaa siam a ni.

K Sapdanga chuan, Police depart-ment-in 'Year of Discipline' a kalpui mek chu hmunhma hmasawnna tharte'n nasa taka a puih a beisei thu a sawi a, "Police hnaah discipline, professional conduct leh physical fitness a pawimawh a, PTS-a training standard a tisang lehzual ang," a ti.

Home Minister chuan, constable-a lak thar, batch 70-na, tuna training mekte lakah beiseina sang tak a neih thu sawiin, "Trainee-te tan an hma lam hun atan taksa chak leh inthununna ṭha a pawimawh," a ti a; batch 7-na te chu dik tak leh langtlang taka lak an nih thu leh, recruitment system ṭha chuan Mizoram tan police ṭha leh thiam tak a chher chhuah ngei a beisei thu a sawi.

Ruhrel thar hawnnaah hian DGP Sharad Agarwal leh Home leh Police-a officer-te bakah, department dang officer eng emaw zat an tel.

Mizoram Police tarlan danin, police training tihtunlai zelna atan digital laboratory computer 20 leng neih thar a ni a; hei hian computer zirna tihchangtlun, digital learning leh ICT-enabled training atan nasa taka a puih beisei a ni.

Police training laite’n dik tak leh him zawka silai khawih leh kah an zir theihna tur Firearms Training Simulator thar din a ni a, simulator-ah hian AK-47, INSAS, Glock pistol leh silai dangte a rualin a kah theih.

Taksa tihchaka hriselna vawnna turin gymnasium thar siam siam a ni a, bungraw thar changkang tak tak dah a ni.