Sawhthing sâwngbâwlna project hawng

Chief minister Lalduhoma leh DoNER minister Jyotiraditya Scindia te chuan nimin khan online-in 'Mizoram Ginger Unique Selling Proposition (USP) - Sus-tainable Cultivation & Value Chain Development Project' an hawng. Project hi Ministry of DoNER hnuaiah cheng vbc 189.78 sênga kalpui tur a ni.

Project hawnna inkhawm hi Chief Minister hoin a pisaah hman a in a, Horticulture minister C Lalsawivunga, adviser to CM (Handholding) Dr KC Lalmalsawmzauva, chief secretary Khilli Ram Meena leh sorkar official-te an tel. Delhi aṭangin DoNER minister Jyotiraditya Scindia a tel a, DoNER offcial-te leh Champhaia sawhthing chingtute online-in an tel bawk.

Chief Minister chuan, Mizoram sawhthing chu USP atan DoNER-in a pawm thu a sawi a, "USP a nih tâk avangin cheng vbc 189.78 sênga kalpui turin Sustainable Cultivation & Value Chain Development Project min rawn phalsak. Sustainable cultivation atan te, quality control & food safety atan te, farm mechani-zation & solarisation atan te, post harvest management & processing atante hman a ni ang," a ti.

Lalduhoma chuan, Mizo sawhthing chi thum zingah thíngpui leh thínglaidum te chu kum 2021 khan geographical indication (GI) tag pek a nih thu a sawi a, "Kum 2025 khan chemicals residue endikna Eurofin Analytical Services, Bengaluru-in an neih chu ṭha takin an paltlang tawh," a ti bawk.

DoNER Minister chuan, Mizoram sawhthing, ṭha danglam tak chu zau zawka pho chhuah a nih dawn thu a sawi a, "Loneitute tihhmasawn hi India hmasawnna ke chheh pawimawh a nih avangin anni chawi kâng tur hian kawng hrang hrangin sorkar chuan hma a la a, he project pawh hi ministry dangte nena ṭangrualin loneitute leh society te, state sorkarte nena ṭangkawpin kan kalpui dawn," a ti a; India rama loneitute inthlun zawma hnathawh chu Prime Minister hmathlir a nih thu a sawi.