KHAWTHLIR

Leiṭha man

Bairabi Police leh Bairabi North Branch YMA chuan nimin khan Bairabiah truck pathum aṭangin leiṭha chi khat, Urea ip 1,867 an man a, tualchhunga hralhna angin cheng nuai 4.9 mana chhût a ni. Urea mante hi Kolasib Fertilizer Inspector hnenah hlan niin, a phurhna lirthei khalhtute pawh hren an ni.

Heroin man

Assam Rifles chuan nimin khan Zokhawthara gate bula ip (bag) hnutchhuah aṭangin heroin (no. 4) gram 186 an man a, a neitu hriat a ni lo. Zokhawthar Police Station-ah an hlan a ni.

Zai intihsiak

Minister of state Lalnghinglova Hmar chuan nimin khan a bial, Aizawl West-II chhunga Dinthar YMA Hall-ah MUP Aizawl West II Area 'B' Lengkhawm Zai Intihsiak a hmanpui a, intihsiak ṭanpuina atan Rs 10,000 a hlan. Minister chuan, "Tunlai khawvelah changkannain min luhchilh tawh a, hnam changkang zawkte tihdan en ngun ṭhin mah ila, kan kîr lehna chu hnamah a ni," a ti.

UBI branch hawng

Union Bank of India-in Luangmual, Aizawla branch thar an siam chu nimin khan Aizawl West-I bialtu MLA TBC Lalvenchhunga'n a hawng. UBI hi November 11, 1919-ah din a ni a, India ram leh ram dangah branch 8,697 a nei mek. Mizoramah chuan Aizawlah branch paruk, Mamit, Khawzawl leh Saitualah branch pakhat ṭheuh an nei a ni.

Prarambh 2026

North Eastern Region Income Tax department chuan nimin khan Taxation conference hall-ah 'New Income-Tax Act 2025' chungchang inhrilhfiahna 'Prarambh 2026' an buatsaih. Tribal area-a cheng tribal mite'n dan hluia income tax an âwl ṭhin chu dan tharah pawh àwl zui zel a la nih thu tarlan a ni.

Computer hlan

Rural Development minister Prof. Lalnilawma chuan nimin zing khan Lunglei Circuit House-ah Lunglei district-a VC 22 hnenah computer leh printer a hlan. Computer hi Ministry of Panchayati Raj hnuaia Rashtriya Gram Swaraj Abhiyan aṭanga dawn a ni. RD director Dr Lalngura Tlau chuan, Mizorama VC 830 zingah computer la dawng lo 435 an awm a, computer 154 lei leh mek a ni a, VC zawng zawng pek tur a nih thu a sawi.