Mizorama bank-te CD ratio bituk tlin vek turin sorkarin a beisei - CM

Mizoram Cooperative Apex Bank (MCAB) chuan Reserve Bank of India (RBI)-in scheduled bank-a a dah thar chu May 13, Nilaini khan Aijal Club-ah an lawm a; khuallian chief minister Lalduhoma chuan, Mizorama bank-te chu CD ratio percentage bituk tlin vek turin Mizoram sorkarin a beisei thu a tarlang.

Chief Minister chuan, MCAB-in RBI scheduled bank nihna a pe chu a lawmpui thu a sawi a, "Apex Bank hi Mizo mipui ta liau liau a ni a, a tum lian ber chu Mizoram mipuite'n eizawnna ngêlnghet an neih theih nana hmalak a ni. A thlen chin apiangah mipui pawhin kan chhawr ṭangkai a, tunah hian CD ratio 65.93% a ni," a ti a; ATM neih tamah SBI dawttu nia Mizo ṭawnga inziak ATM booth 45 an enkawl mek chu mipuiin an chhawr ṭangkai thu a sawi.

MCAB-in biak-in sakna loan scheme an nei chu lawmawm a tih thu sawiin Lalduhoma chuan, "Ni tina sum leh pai dah khawl duhte tana Pigmy Deposit Collector in duang chhuak hi miretheite tana ding in nihzia tilangtu a ni," a ti a; CD ratio chungchangah, "RBI-in bank-te chu an CD ratio 60% tal ni turin a beisei a, hei hi Mizoram sorkar pawhin tlin vek turin kan beisei a ni," a ti.

CM Lalduhoma chuan, bank tam takin khawpuiah chauh branch neiin thingtlang an thleng phak lo tih sawiin, "Inzar pharh ṭha lo bank-te hi CD ratio nei hniam an ni tlangpui a, anni hi kan ṭangkaipui meuh em tih kan inzawt fo. Sorkarin kan bank-te nena thawkho a, mi harsate khai chhuahna Handholding kan kalpui a, kan policy tihhlawhtlinna hmanraw pawimawh tak chu bank-te an ni," a ti a; thingtlang lamah inzar zau zel turin MCAB hotute a chah.

Khualzahawm PC Vanlalruata, Cooperation minister pawhin thu sawiin, Cooperation minister a nih laia MCAB-in scheduled bank nihna a nei chu vannei a intih thu a sawi a, "He dinhmuna MCAB a din theih chhan hi bank thuneitute leh thawktute thawhrimna te, Cooperation department hmalakna vangte a ni a, in zaa chungah ka lawm hle a ni," a ti.

MCAB hi kum 1982 khan sum lu (share capital) cheng nuai 16.53 leh thawktu mi 16 nen bul ṭan a ni a; branch 35, ATM 45, thawktu 248 leh vengtu 106 a nei mek. May 12, 2026 khan RBI-in scheduled bank atan a pawm. Kum 2025-26 khan cheng vbc 40.39 an hlêp a, an CD ratio chu 65.93% a ni.