Ran insure theih nan hma la turin chah

AH&Vety minister C Lalsawivunga chuan, National Livestock Mission (NLM) hnuaia animal insurance kal-tlangin Mizorama vawk, bâwng, sial, beram leh kêl vulhtute'n an ran vulhte an insure ngei theih nana hmalakpui turin AH&Vety department-a thawktute a chah.

AH&Vety Minister hian May 13, Nilaini khan Selesiha AH&Vety Rest House-ah Mizoram Veterinary Service Association (MVSA) General Conference vawi 44-a na hmanpui. Thu sawiin, "Hri vanga kan ran vulhte nasa taka kan chàn hnuah NLM hnuaiah February 10, 2026 khan animal insurance kalpui ṭan a ni. He insurance hi India ramah pawh a nei ṭha ber kan ni," a ti. Ran vulhtute'n an rante an insure ngei theih nana hmalakpui tur leh, sorkar hmalakna tihlawhtling turin ṭhahnemngai taka thawk turin Vety department-a thawkte a fuih.

C Lalsawivunga chuan, artuia intodelh turin Thenzawlah Mega Egg Production Project kalpui mek a nih thu sawiin, "Project hi arpui 1,00,000 leh artui 70,000 thla tin tharna tur a ni. Ran chaw lâk tur a vàn tawh avangin nasa takin bawng vulh zat a tlahniam a, he lamah hian ṭan lain, department chuan ran chaw nasa taka ching turin hma a la mek," a ti. Mizoram hmun hrang hrangah ram en mek niin, ran vulhtute an ina kal chilh a, an harsatnate sutkianpui ṭhin a ṭul thu a sawi bawk.

MVSA inkhawmpui hi an president Dr Robert Rualthankhuma'n a kaihruai a; AH&Vety director Dr Lalrotluanga Sailo-in inlawmna thu sawiin, Best PhD Thesis Award dawngtu Dr Malsawmtluangi Ralte hnenah lawmpuina hlan a ni.

MVSA hi October 15, 1975-ah din a ni a; Mizoram Animal Husbandry & Veterinary Service (MAHVS) post 115 zinga 73 thawh khah niin, post ruak 42 a awm mek tih tarlan a ni.