PHE Minister-in Lunglei tui lâkna a en

Public Health Engi-neering (PHE) minister Prof. Lalnilawma chuan May 13, Nilaini khan Pialthleng leh Tlawng lui aṭanga tui lâkna, Greater Lunglei Water Supply Scheme (GLWSS) a tlawh a, AMRUT 2.0 leh SASCI hnuaia GLWSS tihchangtlun hna thawh mek a en.

Prof. Lalnilawma chuan, Lunglei châwmtu tui lakna tur Tlawng lui khuah hna zawh thawkhat a ni tawh tih sawiin, "Tuikhuah hmang hian Lunglei khawpuiin tuia harsatna a tawh ṭhin tam tak sutkian a ni dawn. Hetihrual hian, tui semna hmanrua leh a dah khawlna duh anga peih a la nih loh avangin mipui beisei anga tui hnianghnar zawka sem theih a la ni lo," a ti a; chak zawka hmalak zel a nih tur thu a sawi.

GLWSS atana Tlawng luia tuikhuah (gravity concrete impounding dam) siam nan cheng vbc 4.7 ruahman niin, HS Construction, Aizawlin an thawk. Tuikhuah chu metre 13-a sang a ni a, tui a tling khat a nih chuan litre maktaduai 240 tling tura chhût a ni.

GLWSS hman mek hi November 22, 1995-ah hman ṭan a ni a, kum 30 chuang a ni tawh. GLWSS tihchangtlunna turin chi hnihin hmalak mek a ni a; kum 2054 (kum 30 hnu) thlenga mi 1,11,827 châwm thei tur, Tlawng leh Pialthleng lui aṭanga tui lakna tur 'Upgradation of GLWSS (Pumping & Distribution System)' chu SASCI 2024-2025 sum vbc 55.7 sêngin hmalak mek a ni.

AMRUT 2.0 hnuaiah cheng vbc 9.9778 sengin 'Improvement of Water Sources and Extension of Distribution System for GLWSS' hna thawh mek a ni bawk a, he project hnuaiah hian Tlawng lui khuah a ni.