Manipur-a pastor pathum kah hlum kohhran, NGO leh party ten an dem

Manipur-a Thadou Baptist Association kohhran rawngbawltu pathum - Rev. Vumthang Sitlhou, Rev. Kaigoulun Lhouvum leh Rev. Paogaolen Sitlhou te May 13, Nilainia Kangpokpi district, Manipur-a Kotzim leh Kotlen inkarah kah hlum an ni leh, mi dang eng emaw zat kah hliam an ni chu Mizorama kohhran, political party leh tlawmngai pawl ten an dem thu an tarlang.

Council of Churches in Mizoram chuan thuchhuah siamin, rawngbawltu pathum kah hlum an ni chuan India hmarchhak biala Kristiante rilru a tihnat thu an tarlang a, "Hetiang pawikhawihna leh tharum thawhna hi CCM chuan na takin a dem a, Kristian zawng zawngte chu Manipur-ah remna leh muanna a awm theih nan ṭawngṭai turin kan ngen a ni," an ti.

Central YMA chuan, "Hetianga mi pawisawilo leh sakhaw hruaitute kah hlum an ni hi pawi kan tiin kan dem tak zet. Thil thlenga mawhphurtute an phu tâwka hrem an nih ngei theih nan hma la turin sorkar laipui kan ngen," an ti a; pastor thi tate chhungte an tawrhpui thu leh, Zo fate leh hnam hrang hrang inkara remna leh muanna a awm an duh thu an tarlang.

Pastor pathum kah hlum chung-changah hian Mizoram Presbyterian Kohhran, Baptist Church of Mizoram, Zoram People Movement party, Mizoram Pradesh Congress Committee, Mizoram BJP, Zo Reunification Organisation leh Zote Global Network te pawhin thuchhuah siamin, an dem thu an tarlang bawk.