Mizoram hi digital state-a siam kan duh - CM

Chief minister Lalduhoma chuan, tunlai thiamna hmanga mipui tana awlsamna siam sorkarin a ngaih pawimawh thu leh uar zel an tum thu a sawi a, "Mizoram hi digital state-a siam hial kan duh," a ti.

CM Lalduhoma hian nimin khan CM conference hall-ah General Administration department (GAD) enkawl Mizoram sorkar quarters luah dilna leh pekna online-a kalpuina 'Quarters Allotment Management System leh online hmanga Mizoram House hauh (book)-na 'Mizoram House Online Reservation System' a hawng.

Hawnna inkhawmah Chief Minister chuan, tunlai thiamna hmanga mipui tan awlsamna siam uar zel an tum thu sawiin, "Mizoram hi digital state-a siam hial kan duh. Sorkar quarters luah dilna hi lehkha thehluh hmangin kan kalpui a, computer pakhatah dahṭhat a ni. Quarters ruak te, pension leh thihna te vanga singsak ngaite pawh manual veka kalpui a ni a, a enkawltu leh diltute tan a buaithlak a, online-a kalpui a nih chuan awlsam takin internet kaltlangin a tih theih dawn a ni," a ti.

Mizoram pawna Mizoram House-te chu GAD pisaa kal kher ngai loin online hmanga hauh theih a nih tawh thu sawiin Lalduhoma chuan, "Aizawl páwna chengte tan a hahdamthlak zual dawn," a ti a; GAD-a thawkte leh online portal siamtu Information and Communication Technology leh Mizoram State e-Governance Society te chungah an lawm thu a sawi.

* Quarters Allotment Management System: August 2025-ah buaipui ṭan niin, ICT department-in an siam a, hman nghal theih a ni (qams.mizoram.gov.in).

* Mizoram House Online Reservation: MSeGS siam a ni a, March 2, 2026-ah enchhin a ni. Hawn a nih hmain dilna 2,796 a lut a, mi 1,640 hnenah allotment pek a ni (mizoramhouse.mizoram.gov.in).