Mizo hla phuahtu ropui V Thangzama a liam ta

Mizo zinga hla phuahtu lâr berte zinga mi V Thangzama (91), Dawrpui Vengthar chu May 14, Ningani zan dar 11:35 khan Aizawl Hospital & Research Centre-ah a thi a, nimin khan vui a ni.

V Thangzama hi March 23, 1935 khan Ngopa khuaah a piang a, zirna bulṭhut lam Ngopaa a zawh hnuah Mizoram pawnah lehkha a zir a, kum 1958 khan City College, Calcutta aṭangin B.Com. a zo a; kum 1960-ah Vanlalengi, Dawrpui nen an innei.

Kum 1960-1961 velah Mizo High School-ah a thawk a, chumi hnuah Assam Civil Service-ah a lut. Kum 1972-a Mizoram union territory a nih hnuah Mizoram Civil Service-ah a awm zui a; Mizoram sorkarah officer hna pawimawh chi hrang hrang thawkin, January 1994 khan pension-in a chhuak.

October 8, 1978 khan Dawrpui Vengthar Presbyterian Kohhran upa atan nemngheh a ni a, tualchhung kohhran, pastor bial leh presbytery-ah te mawhphurhna pawimawh tak tak a chelh tawh. YMA lamah pawh a inhmang hle a, kum 1977 - 1983 chhung khan Central YMA vice president a ni.

V Thangzama hi Mizo zinga hla phuahtu lar berte zinga mi niin, hla 44 a phuah bakah hla 17 a letling a; a hla phuah zingah hla ṭha leh lar tak tak eng emaw zat a awm.

V Thangzama hi nimin khan Dawrpui Vengthar Kohhran hall-a thlahna hun hman a nih hnuah, Dawrpui Vengthar Kohhran biak-inah vui a ni.

V THANGZAMA HLA LAR ZUALTE

1. Tho la, ding ta che (Khuavel i la chhing ngei ang)

2. Siamtu zai ngai mai rawh

3. Van aw mawi ri chu ngai r'u

4. Rual tin khumtu YMA

5. Ka di chhawrthlapui